رۋحاني كەلىسىم كۇنىنە وراي وبلىس ورتالىعى – وسكەمەندە «رۋحاني مۋزىكا جانە پوەزيا كەشى» ءوتتى. شارا اياسىندا دوستىق ءۇيى – قوعامدىق كەلىسىم ورتالىعىندا كورمە اشىلىپ, قۇندى جادىگەرلەر كەلۋشى جۇرتتىڭ نازارىنا ۇسىنىلدى. جادىگەرلەر ىشىندە 1637 جىلى ماسكەۋ باسپا سارايىندا باسىلعان ءدىني كىتاپتار, قۇران-كارىمنىڭ بىرنەشە تىلگە اۋدارىلعان نۇسقالارى, 1830-شى جىلداردىڭ باسىندا باي كوپەستەر سالدىرعان وسكەمەندەگى العاشقى مۇسىلمان مەشىتى, قازىرگى جاستار ساياباعى اۋماعىندا تۇرعان پوكروۆ عيباداتحاناسىنىڭ ماكەتتەرى بار.
كورمەنى جۇرتشىلىقپەن بىرگە وبلىس اكىمىنىڭ ورىنباسارى اسەم ءنۇسىپوۆا دا تاماشالاپ, دوستىق ۇيىندە وتكەن رۋحاني كەشكە قاتىسىپ, وبلىس تۇرعىندارىن رۋحاني كەلىسىم كۇنىمەن قۇتتىقتاپ, وڭىردە ۇلتارالىق تاتۋلىقتى, كونفەسسياارالىق كەلىسىم مەن تۇراقتىلىقتى نىعايتۋعا ەلەۋلى ۇلەس قوسىپ جۇرگەن ءبىر توپ مەملەكەتتىك قىزمەتشىلەر مەن ءدىني بىرلەستىكتەر جەتەكشىلەرىن ماراپاتتادى. «بۇل مەرەكەنىڭ كوپۇلتتى جانە كوپكونفەسسيالى ەلىمىزدىڭ وركەندەپ, دامۋىندا الاتىن ءمانى مەن ماڭىزى ەرەكشە. سوندىقتان دا ەلباسىمىز 1992 جىلدىڭ 18 قازانىندا رۋحاني كەلىسىم كۇنىن بەكىتتى. ونىڭ ناتيجەسىن وزدەرىڭىز بۇگىن كورىپ وتىرسىزدار. ءبىزدىڭ وبلىستا دا ءتۇرلى ۇلتتار مەن ۇلىستار ءدىنى مەن سەنىمىنە قاراماستان تاتۋ-ءتاتتى ءومىر ءسۇرىپ كەلەدى. وسىنداي تاماشا كۇنى بارشا شىعىسقازاقستاندىقتاردىڭ وتباسىنا باقىت, تاتۋلىق پەن كەلىسىم تىلەيمىن» دەدى وبلىس اكىمىنىڭ ورىنباسارى.
وسكەمەن
